ઋચા

આપણે અજવાસના પુત્રો છીએ ,
આપણે ઉલ્લાસના પુત્રો છીએ.
કાળ સાથે આપણી ટક્કર સતત ,
આપણે વિશ્વાસના પુત્રો છીએ.

સ્થિતિબોધ

એમનાથી અહીં અવાતું ક્યાં !
આપણાથીય ત્યાં જવાતું ક્યાં !

દૃષ્ટિપથમાં મરુસ્થળો કેવળ ,
આભ પણ પૂર્વવત્‌ છવાતું ક્યાં !

રોજ ઊગી તમસ્‌ ધરે સૂરજ ,
ગીત અજવાસનું ગવાતું ક્યાં !

મૂળ ઊર્ધ્વે અને અધ: શાખા ,
વૃક્ષ એવું હવે વવાતું ક્યાં !

અદ્યસત્ર

ગત-અનાગત કાળ જેવું છે જ ક્યાં !
આજના આકાશના પંખી અમે.

FOUR STROKE ગઝલ

ગમખ્વાર બનાવો છે ખૂંખાર બનાવો છે
ચિક્કાર બનાવો છે ધિક્કાર બનાવો છે

હિંસાળ બનાવો છે ભીંસાળ બનાવો છે
વિકરાળ બનાવો છે ઝૂંઝાર બનાવો છે

પૂર્વેય બનાવો છે પશ્ચેય બનાવો છે
મધ્યેય બનાવો છે દુશ્વાર બનાવો છે

કુત્તાક બનાવો છે ભૂંડાક બનાવો છે
સત્તાક બનાવો છે સરકાર બનાવો છે

શું કાવ્ય લખું છું હું શું કાવ્ય સુણે છે તું
દંતાળ બનાવો છે નખદાર બનાવો છે

પ્રસ્તાવ-

અંધ તટ પર ક્યાંક કંદીલ હોય છે,
હર કિનારે કૈંક હાંસિલ હોય છે.
આપણે સૌ તો હજી મઝધારમાં,-
મંઝિલોની પાર મંઝિલ હોય છે.